eus eige leedsjes
Op de febrik vaan Regout is dèks gestaak gewore! Soms mer veur e paar oor, meh dao zien ouch stakinge bekind vaan daog, weke, jao zelfs maonde!
In aprèl 1886 waor ’n staking vaan de glaasblozers. Dees staking heet mer e paar daog gedoord. ’t Gesjèl góng euver ’t verliege vaan de tarieve en dat woort neet gepik. Volges M. (Geel) Ubachs (in “Een eeuw modern kapitalisme”) woort ’t volgende door de stakers gezoonge op de wijs vaan e bestaond leedsje.
Och nein Menhier Regout
Nog neet veur viefendaartig
Veer goeje de kan dao neer
Veer goon nao Sint Lambeer.
Och nein! Och nein!
Veer goon nao Sint Lambeer.
In 1896 bij ’n nui staking op ‘t febrik vaan Regoo (Regout) woort dit leedsje (sjijns) aongepas, dat wèlt zègke de ierste 2 couplètsjes.
De glaassliepers lagte ‘t wèrk in 1896 neer, neet allein veur de loensverlieginge meh ouch veur de arrogante meneer, boe-op zie behandeld woorte door de zäöns vaan de stiechter, Pierre Regout. De staking doorde 7 maond en zouw ‘ne ramp weure veur de Mestreechse arbeidersbeweging.
De patroens lete niks nao um de staking te breke. Ach oonderkroepers (werkwèllege) woorte gevoonde um zoe de staking te laote mislukke. En wie de cent vaan de stakingskas nao e tiedsje ouch op waore, kóste de wèrklui niks aanders doen es touwgeve.¹
‘t Loen vaan ‘ne jonge wèrkmaan dee in de glaasblozerij wèrkde waor nog geine gölle per daag! ‘t Laog draon wieväöl ervaring heer had en wàt heer deeg. Heer begós met 40 cent per daag en es heer “derde gamin” gewore waor verdeende heer miejer.
Heer mós zoe’n 10 ore per daag wèrke.
D’n hier J. Robeers waor in 1887 glaasblozer en 48 jaor aajd. Heer zaot 37 jaor in ‘t vak en had zien hoegtepunt wat de kezjem betröf, bereik. D’n hier Robeers verdeende tösse de 33 en 35 gölle per 14 daog. Meh e loentuutsje mèt zoeväöl drin waor ‘n oetzundering.²
‘n Vrouw op de sjèlderkamer verdeende 7 tot 9 gölle per 14 daog.³
BRONNE
Verzet arbeiders (Limburgs museum)
¹ G.H.Pieters: “Een kwart eeuw van strijd” vaanaof blz. 132
² Jacques Gielen: ‘t Verhuur vaan J.Robeers in de “Parlementaire Enquete” vaan 1887 blz.178 en 179 oet ‘t book “Een kwaad leven” deel 2 Maastricht
³ Jacques Gielen: ‘t Verhuur vaan H.J.Hollands in de “Parlementaire Enquete” vaan 1887 blz 236 oet ‘t book “Een kwaad leven” deel 2 Maastricht
Uitgelichte foto: bron
